رد الفنان تامر عبد المنعم على هجوم مطرب المهرجانات حمو بيكا بعدما قام الاخير بانتقاده بسبب هجومه على مطربي المهرجانات في ندوة تابعة لقصور الثقافة بحضور الفنان هاني شاكر نقيب الموسيقيين وقال تامر عبر صفحته الشخصية على فيسبوك :" السؤال للدكتور حمو بيكا ولا ما حموهوش.. أنا ما هاجمتكش أساسا كل الموضوع إني استضفت النجم الكبير هاني شاكر في صالون ثقافي حول إشكالية حرية الإبداع والمنع وبالمناسبة قال فيه حمو يذاكر كويس ويدخل الإمتحان وربنا معاه يعني ما منعكش"

واستكمل تامر :"أما بالنسبة لوطنيتك اللي اقحمتها في الموضوع.. أحب أقولك أنا لم أشكك فيها وبالمناسبة وجودك أنت وفرقتك في احتفالات أكتوبر مش دليل عشان تستند عليه " واختتم قائلا :"شكرا.. نسيت أقول لك شوف حد بيعرف يقرأ عشان يقرأ لك"

وكان حمو بيكا قد هاجم تامر عبد المنعم في بث مباشر له عبر صفحته على إنستجرام قال فيه:" لقيت ندوة كبيرة معمولة والدنيا مقلوبة علينا فيها ممثلين وواحد ممثل اسمه تامر عبد المنعم ويقولك أنا مش هتكلم غير لما الناس تنزل من على المسرح" 

وتابع قائلا:" المكان اللي عامل عليه الندوة ده اسمه المنصة متقولش مسرح أنت مش واقف تغني وانا مصري وعندي ولاء أكتر منكم وعملت احتفالية في الميادين المختلفة عشان ٦ اكتوبر " واستكمل حديثه:"هو أنتوا ليه بتتنمروا علينا ليه بتعاملونا كأننا حشرة ليه شايفنا زبالة.. لا إحنا ولاد ناس ومتربيين وعاملين ندوة كبيرة ماتستهزأش بيا عصر أم كلثوم وعبد الحليم انتهى إحنا في سنة 2021 "

ويذكر أن نقابة المهن الموسيقية برئاسة الفنان هاني شاكر قد أصدرت قرار بمنع عدد من مطربي المهرجانات ممن لم يحملوا تصاريح للغناء لحين عرضهم على لجنة الاستماع وإصدار تصاريح لهم وكان حمو بيكا من بين هذه الأسماء الممنوعة